Mitohy hatrany ny fanatanterahana fitsirihana tampoka azy ireo izay tarihin'ny Préfet de police miaraka amin'ireo mpitandro filaminana, ny Faritra Analamanga, ireo Lehiben'ny distrika ary koa ireo solontenan'ny Kaominina Antananarivo Renivohitra.

Tao amin'ny boriborintany voalohany sy fahefatra ary fahadimy no nanatanterahana izany androany. Izao no natao dia ny hanamafisana hatrany ny andraikitr'ireo andrimasom-pokonolona sy hamerenana haingana ny fandriam-pahalemana eny anivon’ny fiarahamonina.

Nambaran'ny Préfet de Police fa : "Tsy hiady aman'olona akory fa manara-maso ireo mpanakorontana ary hiantso ny mpitandro ny filaminana raha misy ny olana sy fanakorontanana mihoa-pefy.

Mitovy ny fampiharan-dalàna ho an'ny olona rehetra, na iza izy na iza".

Ankoatra izay dia nisy ihany koa ny fanakatonana ireo toeram-pisotroan-toaka (Bar) izay mbola misokatra amin'ny ora tsy ahazoan-dalana, ny fanaraha-maso ireo olona mitondra kodiaran-droa izay efa mamo, ny fivezivezen'ny zaza tsy ampy taona amin'ny alina, ary ny fitsirihana ny olona mitondra rongony.